𞤖𞤮𞤤 𞤳𞤮 𞤱𞤮𞤲𞤭 𞤆𞤵𞤤𞤢𞥄𞤪/𞤊𞤵𞤤𞤬𞤵𞤤𞤣𞤫؟

𞤆𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤳𞤮 𞤯𞤫𞤥𞤲'𞤺𞤢𞤤 𞤥𞤢𞥄𞤲𞤢𞥄, 𞤱𞤮𞤲𞤭 𞤯𞤫𞤥𞤲'𞤺𞤢𞤤 𞤳𞤫𞥅𞤪𞤭𞤲'𞤺𞤢𞤤 𞤼𞤮 𞤦𞤢𞤲𞤺𞤫 𞤭𞤲𞥆𞤵𞤣𞤫 𞤺𞤫𞤯𞤫 𞤫

 𞤪𞤮𞤳𞥆𞤵𞤣𞤫 𞤯𞤵𞤥ʼ𞤫𞤲 𞤥𞤢𞥄𞤲𞤢𞥄. 𞤆𞤢𞤴𞤺𞤮𞤤 𞤥𞤢𞤺𞥆𞤢𞤤 𞤭𞤲𞤢 𞤬𞤢𞤱𞤭𞥅 𞤸𞤫 𞤼𞤮𞤩𞥆𞤫 𞤳𞤫𞥅𞤱𞤯𞤫, 𞤳𞤮 𞤱𞤢𞤴𞤭 𞤲𞤮 𞤸𞤫𞥅𞤱𞤣𞤫 𞤢𞤤𞤳𞤵𞤤𞤫 𞤫 𞤲'𞤦𞤢𞥄𞤣𞤭 𞤨𞤭𞤪𞤤𞤭𞤺𞤮𞤤 𞤺𞤮𞤤𞥆𞤫 𞤫 𞤬𞤭𞤪𞤮 𞤳𞤫𞤤𞤥𞤫𞥅𞤲'𞤣𞤭…

𞤀𞤤𞤳𞤵𞤤𞤫 : 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤩𞤵𞤪𞤭 𞤸𞤫𞥅𞤱𞤣𞤫 𞤢𞤤𞤳𞤵𞤤𞤫 𞤫 𞤬𞤢𞤪𞤢𞤴𞤧𞤫 𞤫 𞤢𞤪𞤢𞤦 𞤫 𞤫𞤲𞤺𞤫𞤤𞤫… (𞥓𞥓 𞤢𞤤𞤳𞤵𞤤𞤢𞤤). 𞤏𞤮𞤲 𞤢𞤤𞤳𞤵𞤤𞤫 𞤯𞤫 𞤯𞤫𞤥𞤲'𞤺𞤢𞤤 𞤲'𞤺𞤢𞤤 𞤶𞤮𞤺𞤭𞥅 𞤱𞤫𞥅𞤩𞤢𞥄𞤲𞤭 𞤼𞤢𞤱𞤣𞤫 𞤸𞤫 𞤯𞤫𞤥𞤯𞤫 𞤺𞤮𞤯𞥆𞤫, 𞤳𞤮 𞤱𞤢𞤴𞤭 𞤲𞤮 𞤢𞤤𞤳𞤵𞤤𞤫 𞤯, 𞤰, 𞤽…

𞤆𞤭𞤪𞤤𞤭𞤼𞤺𞤮𞤤 𞤺𞤮𞤤𞥆𞤫 : 𞤨𞤵𞤤𞤢𞥄𞤪 𞤬𞤵𞤤𞤬𞤵𞤤𞤣𞤫 𞤭𞤲𞤢 𞤶𞤮𞤺𞤭𞥅 𞤤𞤮𞤥𞤼𞤮 𞤺𞤮𞤤𞥆𞤮𞥅𞤩𞤫 𞥗𞤯𞤮 𞤧𞤮 𞤫𞤲 𞤤𞤭𞤥𞤼𞤭𞥅 𞤸𞤫𞥅𞤲 𞤤𞤮𞤥𞤼𞤮 𞤺𞤮𞤤𞥆𞤮𞥅𞤱𞤮 𞤲𞤢𞥄𞤼𞥆𞤭𞤲𞤮𞥅𞤱𞤮 : 𞤫𞤲𞤫𞤲, 𞤳𞤮 𞤲𞤮𞥅𞤲 𞤲𞤫 𞤧𞤮 𞤫𞤲 𞤰𞤫𞥅𞤱𞤭𞥅 𞤺𞤮𞤤𞥆𞤢𞤤 𞤶𞤮𞤺𞤮𞤪𞤲'𞤺𞤢𞤤, 𞤼𞤮 𞤦𞤢𞤲𞤺𞤫 𞤧𞤢𞤸𞤢𞥄, 𞤢𞤲'𞤺𞤢𞤤 𞤬𞤭𞤪𞤤𞤭𞤼𞤭𞤪𞤫𞥅 𞤸𞤫 𞤲'𞤦𞤢𞥄𞤣𞤭𞥅𞤶𞤭 𞤳𞤫𞥅𞤱𞤯𞤭 : 𞤥𞤢𞥄 𞤮 𞤢𞤪, 𞤮𞤥𞤮 𞤢𞤪𞤢, 𞤮 𞤢𞤪𞤢𞤼, 𞤮 𞤢𞤪𞤮𞤴𞤢𞤼, 𞤮 𞤢𞤪𞤢𞤼𞤲𞤮, 𞤮 𞤢𞤪𞤢𞤼𞤲𞤮𞥅…

𞤊𞤭𞤪𞤮 𞤳𞤫𞤤𞤥𞤫 : 𞤳𞤫𞤤𞤥𞤫𞥅𞤲'𞤣𞤭 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤭𞤲𞤢 𞤸𞤫𞥅𞤪𞤮𞤪𞤭𞥅 𞤬𞤢𞤴𞤣𞤫 𞤥𞤵𞤥, 𞤷𞤢𞤻𞤳𞤭 𞤨𞤵𞤤𞤢𞥄𞤪 𞤬𞤵𞤤𞤬𞤵𞤤𞤣𞤫 𞤭𞤲𞤢 𞤯𞤫𞤤𞤻𞤭𞤪𞤢 𞤳𞤢𞤪𞤢𞤤𞥆𞤢𞥄𞤺𞤢𞤤 𞤼𞤭𞤥𞥆𞤵𞤲'𞤺𞤢𞤤 𞤫 𞤻𞤫𞥅𞤻𞤢𞤤 𞤦𞤢𞤴𞤣𞤵𞤲'𞤺𞤢𞤤 : 𞤭𞤲𞤢 𞤸𞤮𞤤𞥆𞤢 𞤫𞤲 𞤯𞤵𞥅𞤥 𞤥𞤢𞤸𞤣𞤭 𞤸𞤫𞤤𞤥𞤫𞤪𞤫 𞤨𞤵𞤤𞤢𞥄𞤪

𞤆𞤫𞤤𞥆𞤫 𞤭𞤲𞤯𞤫 : 𞤯𞤫𞤥𞤲'𞤺𞤢𞤤 𞤲'𞤺𞤢𞤤 𞤭𞤲𞤢 𞤶𞤮𞤺𞤭𞥅 𞤨𞤫𞤤𞥆𞤫 𞤭𞤲𞤯𞤫 𞤸𞤫𞤣𞥆𞤫 𞥒𞥐 𞤼𞤢𞤱𞤭 𞤸𞤫𞥅𞤲 𞤬𞤫𞤣𞥆𞤫 𞤳𞤢𞤤𞤢 𞤭𞤲𞤢 𞤶𞤮𞤺𞤭𞥅 𞤸𞤢𞤼𞥆𞤢𞤲 𞤳𞤢𞥄𞤱𞤲𞤭𞥅𞤯𞤮 𞤲'𞤺𞤢𞤥 𞤧𞤭𞤬𞤢𞥄𞤣𞤫 𞤭𞤲𞤣𞤫 𞤼𞤮𞤯𞥆𞤭𞥅 𞤲'𞤣𞤫. 𞤉𞤲 𞤲'𞤶𞤵𞥅𞤼𞤲𞤮𞤼𞤢𞥄𞤳𞤮 𞤯𞤮𞥅𞤲 𞤧𞤢𞤦𞤵 𞤯𞤵𞥅𞤥 𞤩𞤮𞥅𞤴𞤭𞥅 𞤴𞤭𞤥𞤫𞥅𞤣𞤫

𞤕𞤫𞥅𞤳𞤭𞤪𞤯𞤫 : 𞤯𞤮𞥅𞤲 𞤲𞤫 𞤳𞤢𞤣𞤭 𞤫𞤲 𞤲'𞤶𞤵𞥅𞤼𞤲𞤮𞤼𞤢𞥄𞤳𞤮 𞤧𞤢𞤦𞤵 𞤶𞤮𞥅𞤲𞤭 𞤳𞤢𞤤𞤢 𞤶𞤢𞤲𞤺𞤮𞥅𞤱𞤮 𞤯𞤫𞤥𞤲'𞤺𞤢𞤤 𞤲'𞤺𞤢𞤤 𞤢𞤲𞤣𞤭𞥅 𞤱𞤮𞤲'𞤣𞤫 𞤫 𞤲'𞤣𞤫𞤪 𞤸𞤫𞤤𞤥𞤫𞤪𞤫 𞤱𞤮𞥅𞤼𞤫𞤪𞤫 𞤫𞤯𞤫𞤲 𞤲'𞤦𞤢𞥄𞤱𞤭 𞤣𞤢𞤻𞤣𞤫 𞤷𞤫𞥅𞤳𞤭𞤪𞤯𞤫 𞤳𞤫𞥅𞤱𞤯𞤫 𞤸𞤢𞥄 𞤸𞤫𞤤𞤥𞤫𞤪𞤫 𞤲'𞤣𞤫 𞤥𞤫𞤼𞥆𞤢 𞤱𞤮𞤱𞤤𞤵𞤣𞤫 𞤴𞤫𞤪𞤵 : 𞤲𞤢𞤬𞤼𞤮𞤲'𞤣𞤭𞤪𞤮𞤴𞤣𞤫, 𞤱𞤢𞤤𞥆𞤢 𞤶𞤭𞥅𞤩𞤮𞥅 𞤱𞤮𞤱𞤤𞤵𞤣𞤫 𞤶𞤭𞥅𞤩𞤮𞥅 𞤬𞤢𞥄𞤥𞤣𞤫, 𞤴𞤫𞤪𞤵 : 𞤩𞤢𞤥𞤼𞤭𞤲𞤮𞤲'𞤣𞤭𞤪𞤭𞤪𞤮𞤪𞤮𞤴𞤢𞤼𞤲𞤮 ; 𞤼𞤫

𞤧𞤫𞥅𞤳𞤭𞤪𞤣𞤫 𞤸𞤫𞥅𞤲 𞤳𞤢𞤤𞤢 𞤢𞤪𞤣𞤢 𞤫 𞤥𞤢𞥄𞤲𞤢𞥄 𞤥𞤵𞤥.

𞤐'𞤘𞤢𞤥 𞤢𞤻𞤣𞤫 𞤱𞤮𞤯𞥆𞤭𞤲𞤮𞤴𞤣𞤫, 𞤧𞤢𞤦𞤵 𞤫𞤲 𞤲'𞤦𞤢𞥄𞤱𞤢𞥄 𞤼𞤫 𞤫𞤲 𞤳𞤢𞤼𞥆𞤢𞤲𞤢𞥄𞤲𞤭 𞤸𞤢𞥄𞤤𞤣𞤫 𞤬𞤮𞤬, 𞤲'𞤶𞤢𞤸𞤫𞤲 𞤸𞤫 𞤼𞤮𞤩𞥆𞤫𞤪𞤫 𞤧𞤢𞤳𞥆𞤭𞤼𞤭𞥅𞤲'𞤣𞤫 𞤸𞤫 𞤲'𞤣𞤫𞥅 𞤯𞤮 𞤤𞤮𞤱𞤪𞤫, 𞤯𞤵𞤥 𞤱𞤮𞤲𞤭 𞤥𞤢𞥄𞤲𞤢𞥄 𞤩𞤫𞤧𞤯𞤮.

_ 𞤑𞤫𞤤𞤥𞤫 𞤳𞤫𞥅𞤱𞤯𞤫 𞤲'𞤺𞤢𞤥 𞤥𞤢𞥄𞤲𞤢𞥄 𞤺𞤮𞥅𞤼𞤮: 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤭𞤲𞤢 𞤶𞤮𞤺𞤭𞥅 𞤸𞤢𞤼𞥆𞤢𞤲 𞤧𞤫𞤯𞤣𞤫 𞤥𞤢𞥄𞤲𞤢𞥄 𞤸𞤫𞤤𞤥𞤫𞤪𞤫 𞤴𞤢𞤤𞤼𞤭𞤲𞤢 𞤬𞤭𞤪𞤮𞤴𞤮𞤲 𞤥𞤵𞤥 𞤼𞤮𞤳𞤮𞤧𞤮𞤲 𞤲'𞤺𞤮𞤲𞤳𞤮𞤲 𞤲'𞤣𞤫𞤪 𞤥𞤵𞤥. 𞤀𞤯𞤢 𞤱𞤢𞥄𞤱𞤭 𞤴𞤭𞤴𞤣𞤫 𞤳𞤫𞤤𞤥𞤫 𞤧𞤢𞤨𞥆𞤮 𞤱𞤢𞤤𞥆𞤢 𞤩𞤵𞤪𞤢 𞤼𞤢𞤱𞤭 𞤳𞤮 𞤸𞤫 𞤥𞤢𞥄𞤲𞤢𞥄 𞤺𞤮𞥅𞤼𞤮. 𞤐'𞤘𞤢𞤥 𞤲𞤫𞤱𞤲𞤵𞤣𞤫 𞤺𞤮𞤤𞥆𞤫 𞤥𞤫𞤲 𞤰𞤫𞤬𞤼𞤫𞤲 𞤴𞤫𞤪𞤵 𞤸𞤫 𞤳𞤫𞤤𞤥𞤫 𞤩𞤵𞤪𞤯𞤫 𞤦𞤢𞤯𞤼𞤭𞤲'𞤣𞤫 𞤸𞤫 𞤲'𞤺𞤵𞥅𞤪𞤲'𞤣𞤢𞤥 𞤬𞤵𞤤𞤩𞤫:

𞤢/ 𞤼𞤮𞤩𞤮: 𞤶𞤢𞤲𞤶𞤢, 𞤲'𞤺𞤢𞤼𞤢𞤥𞤢𞥄𞤪𞤫, 𞤥𞤢𞥄𞤥𞤢𞥄𞤪𞤫, 𞤱𞤭𞤧_𞤱𞤭𞤧, 𞤴𞤢𞤪𞤢𞤤 (𞤶𞤢𞤪𞤢𞤤), 𞤶𞤵𞤳𞤮, 𞤁𞤫𞤥𞤦𞤢 𞤣𞤭𞤽𞤢𞥄𞤪𞤫, 𞤸𞤮𞤳𞥆𞤭𞤼𞤫𞤪𞤫, 𞤲'𞤦𞤢𞤴𞤪𞤭𞤼𞤢𞤥, 𞤦𞤮𞤱𞤼𞤫…

𞤦/ 𞤤𞤢𞥄𞤱𞤮𞤤: 𞤦𞤵𞤪𞤣𞤵𞤦𞤵𞤶𞤮𞤤(𞤱𞤢𞤤𞥆𞤢 𞤦𞤢𞤤𞥆𞤢𞤽𞤢𞥄𞤱𞤮𞤤), 𞤥𞤮𞤧𞤮𞤤, 𞤶𞤵𞤪𞤮𞤤, 𞤤𞤢𞤨𞥆𞤮𞤤, 𞤦𞤮𞤤𞤮𞤤, 𞤷𞤫𞤤𞤮𞤤, 𞤷𞤮𞤣𞤮𞤤,𞤨𞤫𞤪𞤮𞤤, 𞤳𞤢𞤤𞥆𞤵(𞤱𞤢𞤤𞥆𞤢 𞤳𞤢𞤤𞥆𞤮𞤤…), 𞤲'𞤦𞤫𞤣𞥆𞤢(𞤱𞤢𞤤𞥆𞤢 𞤲'𞤦𞤫𞤣𞥆𞤢𞤱𞤮𞤤)…

𞤷/ 𞤸𞤢𞤩𞥆𞤵𞤣𞤫: 𞤬𞤭𞤩𞤣𞤫, 𞤶𞤮𞤥𞤣𞤫, 𞤽𞤢𞥄𞤽𞤣𞤫,𞤽𞤫𞥅𞤽𞤣𞤫, 𞤪𞤢𞤯𞤢𞥄𞤣𞤫, 𞤱𞤢𞤶𞤣𞤫, 𞤸𞤵𞤥𞤣𞤫, 𞤧𞤢𞥄𞤲'𞤣𞤫 (𞤧𞤢𞥄𞤲𞤢𞥄𞤣𞤫), 𞤱𞤮𞤪𞤧𞤵𞤣𞤫, 𞤣𞤮𞤳𞥆𞤢𞥄𞤣𞤫…

𞤣/ 𞤲'𞤣𞤭𞤴𞤢𞤥: 𞤥𞤢𞥄𞤴𞤮, 𞤷𞤢𞥄𞤲𞤺𞤮𞤤, 𞤱𞤫𞥅𞤲'𞤣𞤵, 𞤬𞤫𞤼𞤫𞤪𞤫 (𞤬𞤫𞤼𞤮), 𞤣𞤫𞥅𞤣𞤢𞤤, 𞤦𞤫𞤪𞤶𞤢𞤤, 𞤪𞤫𞥅𞤦𞤫𞤤𞤣𞤫, 𞤲'𞤶𞤢𞤪𞤳𞤢, 𞤧𞤫𞤱𞤲'𞤣𞤫, 𞤤𞤢𞤣𞥆𞤵𞤲'𞤺𞤮𞤤…

𞤫/ 𞤤𞤫𞤴𞤣𞤭: 𞤷𞤫𞥅𞤲𞤢𞤤(𞤧𞤫𞥅𞤲𞤮),𞤲'𞤦𞤢𞥄𞤤𞤱𞤢𞥄𞤤𞤣𞤭, 𞤶𞤫𞤸𞤶𞤫𞤺𞤮𞤤, 𞤸𞤮𞤤𞥆𞤢𞤤𞤣𞤫, 𞤶𞤢𞤳𞤪𞤫, 𞤱𞤢𞤳𞤢 𞤶𞤭𞥅𞤶𞤵, 𞤶𞤢𞥄𞤳𞤢 𞤥𞤢𞤳𞤢, 𞤱𞤢𞤤𞥆𞤫𞤪𞤫, 𞤸𞤢𞤪𞤢𞥄𞤱𞤮(𞤳𞤢𞤪𞤢𞤱𞤢𞤤, 𞤼𞤢𞤷𞥆𞤮𞥅𞤲'𞤣𞤫), 𞤳𞤢𞤪𞤸𞤢𞥄𞤰𞤮𞤤(𞤱𞤮𞥅𞤶𞤫𞥅𞤪𞤫, 𞤼𞤭𞤽𞤢𞥄𞤤𞤫)… 𞤉𞤯𞤫𞤲 𞤲'𞤦𞤢𞥄𞤱𞤭 𞤼𞤫𞤧𞤳𞤢𞥄𞤣𞤫 𞤯𞤮 𞤳𞤫𞤤𞤥𞤫𞥅𞤲'𞤣𞤭 𞤲'𞤦𞤢𞥄𞤱𞤲'𞤣𞤭 𞤱𞤢𞤤𞥆𞤭𞤼𞤣𞤫 𞤺𞤢𞤲𞤣𞤫 𞤳𞤫𞤧𞤫; 𞤫𞤯𞤫𞤲 𞤼𞤫𞤧𞤳𞤭𞤲𞤢 𞤱𞤮𞤲'𞤣𞤫 𞤚𞤢𞤬𞤧𞤭𞥅𞤪𞤵 𞤔𞤋𞤘𞥆𞤌 (𞤴𞤮𞥅 𞤘𞤉𞤐𞤌 𞤴𞤵𞤪𞤥𞤮 𞤯𞤵𞤥), 𞤺𞤮𞥅𞤼𞤮 𞤸𞤫 𞤧𞤢𞤲𞤯𞤢𞥄𞤶𞤭 𞤃𞤭𞤧𞤭𞤪𞤢 𞤱𞤮𞤲 𞤳𞤮 𞤱𞤢𞤯𞤲𞤮𞥅 𞤸𞤫𞥅𞤲 𞤳𞤮 𞤬𞤢𞥄𞤼𞤭 𞤸𞤫 𞤺𞤢𞤲𞤣𞤢𞤤 𞤲'𞤣𞤫𞤥𞤢

𞤉𞤯𞤫𞤲 𞤲'𞤦𞤢𞥄𞤱𞤭 𞤪𞤢𞤩𞥆𞤭𞤯𞤭𞤲𞤢𞥄𞤣𞤫 𞤯𞤮, 𞤼𞤢𞤱𞤭 𞤳𞤢𞤣𞤭 𞤫𞤯𞤫𞤲 𞤲'𞤺𞤢𞤲𞤣𞤭 𞤫𞤲 𞤥𞤫𞤥𞤢𞥄𞤲𞤭 𞤬𞤢𞤲𞥆𞤵𞥅𞤶𞤭 𞤺𞤮𞤯𞥆𞤭 𞤦𞤢𞤴𞤯𞤭 𞤲𞤮 𞤭𞤲𞤯𞤫 𞤳𞤵𞤯𞤭 𞤫 𞤤𞤫𞤯𞥆𞤫, 𞤧𞤭𞤬𞤢𞥄𞤶𞤭 𞤶𞤢𞤱𞤣𞤭, 𞤨𞤮𞤻𞤲'𞤣𞤭 (𞤸𞤫 𞤯𞤫𞤥𞤲'𞤺𞤢𞤤 𞤱𞤢𞥄𞤻𞤮𞥅𞤩𞤫 𞤫 𞤢𞤱𞤮𞥅𞤩𞤫) 𞤫 𞤲𞤫𞤸𞤢𞥄𞤲'𞤣𞤭 (𞤸𞤫 𞤯𞤫𞤥𞤲'𞤺𞤢𞤤 𞤢𞤴𞤲𞤮𞥅𞤩𞤫), 𞤳𞤫𞤲𞤫𞥅𞤤𞤭, 𞤳𞤮𞥅𞤣𞤫, 𞤫𞤳𞤲…

𞤉𞤯𞤫𞤲 𞤲'𞤦𞤢𞥄𞤱𞤭 𞤱𞤭𞤴𞤣𞤫 𞤯𞤮 𞤱𞤢𞤯𞤣𞤫 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤳𞤮 𞤯𞤫𞤥𞤲'𞤺𞤢𞤤 𞤥𞤢𞥄𞤲𞤢𞥄, 𞤽𞤢𞤪𞤯𞤵𞤲'𞤺𞤢𞤤. 𞤃𞤢𞥄 𞤢 𞤼𞤢𞤱 𞤳𞤮 𞤯𞤵𞥅𞤥 𞤢𞤣𞥆𞤢𞤲𞤭 𞤱𞤮𞤲 𞤸𞤫𞥅𞤲 (𞤄𞤮𞥅𞤳𞤢𞤪 𞤚𞤭𞤶𞥆𞤢𞥄𞤲𞤭 𞤐'𞤔𞤢𞥄𞤴) 𞤱𞤭𞤴𞤣𞤫 𞤳𞤮 𞤘𞤉𞤐𞤌 𞤼𞤫𞤤𞥆𞤭𞤲𞤭 𞤲'𞤺𞤢𞤤 𞤸𞤫 𞤽𞤢𞤪𞤯𞤫𞥅𞤲'𞤣𞤫 𞤥𞤢𞤺𞥆𞤢𞤤, 𞤱𞤭𞤴𞤭 𞤴𞤭𞤥𞤩𞤫 𞤥𞤢𞤺𞥆𞤢𞤤 “𞤳𞤮 𞤃𞤋𞥅𞤐 𞤼𞤢𞤺𞤢𞤲𞤭 𞤮𞤲 𞤲'𞤺𞤢𞤤 𞤲'𞤦𞤫𞤤𞤫 𞤮𞤯𞤮𞤲 𞤲'𞤺𞤮𞤲𞤢 𞤩𞤫 𞤀𞤃”. 𞤉𞤯𞤫𞤲 𞤲'𞤦𞤢𞥄𞤱𞤭 𞤱𞤭𞤴𞤣𞤫 𞤳𞤢𞤣𞤭 𞤳𞤮 𞤲'𞤺𞤢𞤤 𞤯𞤫𞤥𞤲'𞤺𞤢𞤤 𞤩𞤮𞥅𞤴𞤲'𞤺𞤢𞤤 , 𞤄𞤮𞥅𞤳𞤢𞤪 𞤚𞤭𞤶𞥆𞤢𞥄𞤲𞤭 𞤸𞤮𞤤𞥆𞤭𞤼𞤭𞥅 𞤱𞤮𞤲'𞤣𞤫 𞤊𞤵𞤤𞤩𞤫 𞤳𞤮𞤯𞤣𞤭𞥅𞤲𞤮 𞤸𞤫 𞤭𞤧𞤪𞤢𞥄’𞤭𞥅𞤤𞤢𞤲𞤢𞥄𞤩𞤫, 𞤮 𞤸𞤮𞤤𞥆𞤭𞤼𞤭𞥅 𞤸𞤢𞥄𞤼𞤵𞤥𞤫𞥅𞤪𞤫 𞤳𞤫𞤤𞤥𞤫 𞤼𞤫𞥅𞤥𞤫𞤣𞤫𞤪𞤫 𞤸𞤫 𞤸𞤫𞤦𞤪𞤮𞥅𞤪𞤫 𞤱𞤢𞤤𞥆𞤢 𞤩𞤵𞤪𞤢, 𞤼𞤢𞤱𞤭 𞤳𞤢𞤻𞤶𞤫 𞤳𞤢𞤤𞤢 𞤫𞤯𞤫 𞤲𞤢𞤲𞤣𞤭 𞤸𞤫 𞤳𞤫𞤤𞤥𞤫 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤼𞤮 𞤱𞤮𞤱𞤤𞤢𞥄𞤲'𞤺𞤮 𞤫 𞤼𞤮 𞤥𞤢𞥄𞤲𞤢𞥄 (𞤫𞤲 𞤲'𞤶𞤭𞤯𞤢𞥄𞤲𞤭 𞤢𞤣𞥆𞤵𞤣𞤫 𞤯𞤮 𞤤𞤢𞥄𞤩𞤲'𞤣𞤢𞤤 𞤼𞤮 𞤊𞤵𞤤𞤩𞤫 𞤲'𞤺𞤵𞤥𞥆𞤭𞥅, 𞤸𞤮𞤤𞤭 𞤥𞤮 𞤩𞤫 𞤲'𞤶𞤭𞥅𞤣𞤭).

𞤑𞤮𞤲𞤮 𞤳𞤢𞤣𞤭 𞤫𞤯𞤫𞤲 𞤨𞤮𞤼𞤭 𞤵𞤧𞤼𞤵𞤣𞤫 𞤦𞤢𞤳𞥆𞤮𞥅𞤶𞤭 𞤸𞤢 𞤲'𞤺𞤢𞤲𞤣𞤫𞤲 𞤧𞤮 𞤯𞤫𞤥𞤲'𞤺𞤢𞤤 𞤥𞤫𞤲 𞤲'𞤺𞤢𞤤 𞤭𞤲𞤢 𞤶𞤮𞤺𞤭𞥅 𞤸𞤢𞤼𞥆𞤢𞤲 𞤱𞤵𞥅𞤪𞤣𞤫 𞤸𞤢𞥄 𞤴𞤫𞥅𞤧𞤮 𞤫 𞤣𞤢𞤯𞤣𞤫 𞤫 𞤺𞤢𞥄𞤼𞤵𞤤𞤫𞥅𞤶𞤫 𞤢𞤣𞤵𞤲𞤢 𞤳𞤫𞤧𞤮 𞤮. 𞤲'𞤦𞤫𞤤𞤫 𞤯𞤫𞤥𞤲'𞤺𞤢𞤤 𞤥𞤫𞤲 𞤲'𞤺𞤢𞤤 𞤭𞤲𞤢 𞤶𞤮𞤺𞤭𞥅 𞤸𞤢𞤲𞤣𞤫 𞤲'𞤣𞤵𞥅𞤲 𞤬𞤭𞤼𞥆𞤢𞥄𞤲'𞤣𞤵 𞤸𞤢𞥄 𞤱𞤢𞥄𞤱𞤢 𞤩𞤢𞤥𞤼𞤢𞥄𞤣𞤫 𞤲𞤮 𞤯𞤫𞤥𞤯𞤫 𞤳𞤮𞤯𞤣𞤭𞥅𞤯𞤫 𞤯𞤫 𞤲𞤭. 𞤅𞤢𞤦𞤵 𞤱𞤮𞤲'𞤣𞤫 𞤯𞤫𞤥𞤲'𞤺𞤢𞤤 𞤥𞤫𞤲 𞤲'𞤺𞤢𞤤 𞤤𞤭𞤥𞤼𞤢𞥄𞤳𞤢 𞤫 𞤯𞤫𞤥𞤯𞤫 𞤣𞤢𞤯𞤮𞥅𞤶𞤫 𞤯𞤮 𞤫 𞥒𞥐𞥓𞥖 𞤭𞤲𞤢 𞤥𞤭𞥅𞤶𞤼𞤭𞤲𞤭𞥅 𞤸𞤢𞤴 𞤧𞤮 𞤫𞤲 𞤳𞤵𞤤𞤢𞥄𞤲𞤭.

𞤑𞤢𞤻𞤵𞤥 𞤲𞤭, 𞤱𞤮𞤲'𞤣𞤭 𞤳𞤮, 𞤸𞤢𞤴 𞤧𞤭𞤲𞥆𞤮 𞤯𞤫𞤥𞤲'𞤺𞤢𞤤 𞤥𞤫𞤲 𞤲'𞤺𞤢𞤤 𞤱𞤮𞤲𞤭𞥅 𞤯𞤫𞤥𞤲'𞤺𞤢𞤤 𞤥𞤢𞥄𞤲𞤢𞥄, 𞤳𞤮 𞤺𞤭𞤤𞤢 𞤸𞤢𞤲𞤳𞤭, 𞤸𞤫 𞤲'𞤣𞤫𞤪 𞤲'𞤺𞤵𞥅𞤪𞤲'𞤣𞤢𞤥 𞤥𞤢𞤱𞤩𞤫 𞤥𞤫𞤲 𞤳𞤫𞥅𞤪𞤭𞤯𞤢𞤥. 𞤑𞤮 𞤥𞤢𞤱𞤩𞤫 𞤥𞤫𞤲 𞤲'𞤺𞤮𞤤𞥆𞤭𞥅 𞤸𞤢𞥄 𞤲'𞤺𞤢𞤤 𞤱𞤢𞤴𞤭 𞤲𞤮𞥅𞤲. 𞤑𞤮𞤲𞤮 𞤫𞤲𞤫𞤲 𞤸𞤢𞤲𞤣𞤫 𞤫𞤲 𞤨𞤮𞤼𞤭 𞤤𞤢𞥄𞤩𞤲'𞤣𞤢𞥄𞤣𞤫 𞤳𞤮 𞤲'𞤦𞤢𞤯-𞤯𞤫𞤲 𞤫 𞤳𞤮 𞤨𞤮𞤼-𞤯𞤫𞤲 𞤱𞤢𞤯𞤣𞤫 𞤧𞤢𞤦𞤵 𞤫𞤯𞤫𞤲 𞤳𞤫𞥅𞤱𞤭 𞤷𞤢𞤯𞤫𞥅𞤤𞤫:

𞤕𞤢𞤯𞤫𞥅𞤤𞤫 𞤱𞤮𞤧𞤼𞤫𞥅𞤣𞤫 : 𞤣𞤵𞤯𞤫 𞤼𞤵𞥅𞤦𞤢𞤳𞤮𞥅𞤩𞤫 𞤫 𞤳𞤫𞤧𞤢𞤥𞤸𞤫𞤧𞤢𞤥𞤢𞥄𞤺𞤵 𞤫 𞤶𞤢𞥄𞤶𞤲'𞤺𞤮𞤤 𞤺𞤵𞤪𞤫 𞤱𞤢𞤯𞤭𞥅 𞤸𞤢𞥄 𞤳𞤮 𞤩𞤵𞤪𞤭 𞤸𞤫𞥅𞤱𞤣𞤫 𞤸𞤫 𞤥𞤫𞤲 𞤲𞤢𞤼𞥆𞤭𞥅 𞤸𞤢𞥄𞤤𞤣𞤫 𞤯𞤫𞤥𞤲'𞤺𞤢𞤤 𞤲'𞤺𞤢𞤤 𞤲𞤮 𞤬𞤮𞤼𞤭𞤪𞤭 (𞤯𞤮𞥅𞤬𞤼𞤢𞥄𞤣𞤫 𞤣𞤮𞥅𞤧𞤯𞤫 𞤥𞤢𞤺𞥆𞤢𞤤) 𞤱𞤢𞤤𞥆𞤢 𞤲𞤢𞤼𞥆𞤭𞥅 𞤸𞤢𞥄𞤤𞤣𞤫 𞤲'𞤺𞤢𞤤

𞤉𞤲 𞤲'𞤺𞤵𞤧𞤼𞤭𞥅𞤥𞤢 𞤸𞤫 𞤬𞤢𞥄𞤪𞤲𞤮𞤪𞤢𞥄𞤣𞤫 𞤯𞤫𞤥𞤲'𞤺𞤢𞤤 𞤲'𞤺𞤢𞤤: 𞤲𞤢𞤼𞥆𞤭𞥅 𞤲𞤮 𞤱𞤢𞤴𞤲𞤮𞥅 𞤸𞤫 𞤣𞤭𞤽𞤭𞤪𞤫…

𞤛𞤢𞤳𞥆𞤫𞤪𞤫 𞤨𞤢𞥄𞤥𞤮𞤲'𞤣𞤭𞤪𞤢𞤤: 𞤸𞤫 𞤥𞤭𞥅𞤶𞤮 𞤢𞤥, 𞤷𞤫𞥅𞤪𞤵𞤲'𞤣𞤢𞤤 𞤳𞤭𞤲𞤯𞤫 𞤫 𞤲'𞤺𞤢𞤣𞥆𞤭𞤲𞤢𞥄𞤶𞤭 𞤬𞤮𞤼𞤲𞤮𞥅 𞤳𞤮 𞤢𞤤𞤯𞤭𞤲'𞤣𞤫 𞤺𞤮𞥅𞤣𞤢𞤤 𞤥𞤫𞤲; 𞤳𞤮𞤲𞤮 𞤧𞤮 𞤱𞤢𞤯𞤭𞥅 𞤣𞤵𞥅𞤻𞤮𞤲'𞤣𞤭𞤪𞤢𞤤 𞤫 𞤣𞤫𞥅𞤲𞤼𞤮𞤲'𞤣𞤭𞤪𞤢𞤤 𞤼𞤢𞤲 𞤶𞤭𞤦𞤭𞤲𞤼𞤢 𞤳𞤮 𞤼𞤢𞤲𞤢𞥄𞤶𞤭 𞤯𞤭 𞤲'𞤶𞤭𞤯𞤢𞥄𞤳𞤢 𞤼𞤢𞤱𞤭 𞤭𞤼𞥆𞤢𞥄𞤲𞤭.

𞤕𞤢𞤯𞤫𞥅𞤤𞤫 𞤬𞤭𞤪𞤮: 𞤧𞤮 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤱𞤮𞤲𞤭𞥅 𞤯𞤫𞤥𞤲'𞤺𞤢𞤤 𞤥𞤢𞥄𞤲𞤢𞥄 𞤲𞤫 𞤭𞤲𞤢 𞤶𞤮𞤺𞤭𞥅 𞤷𞤢𞤯𞤫𞥅𞤤𞤫 𞤬𞤭𞤪𞤣𞤫 𞤴𞤮𞤺𞤢 𞤫 𞤳𞤫𞤤𞤥𞤫 𞤳𞤫𞤧𞤫 𞤴𞤫𞤪𞤵 𞤸𞤫𞤤𞤥𞤫𞤪𞤫 “𞤧𞤫𞤲𞤧” 𞤫 𞤬𞤢𞤪𞤢𞤴𞤧𞤫 𞤬𞤭𞤪𞤣𞤫𞥅 𞤥𞤢𞥄𞤲𞤢𞥄 (𞤭𞤱𞤣𞤭 𞤢𞤪𞤢𞤦), 𞤱𞤢𞤯𞤣𞤫 𞤲'𞤦𞤭𞤴𞤫𞤲 𞤨𞤵𞤤𞤢𞥄𞤪/𞤬𞤵𞤤𞤬𞤵𞤤𞤣𞤫 𞤳𞤮 𞤯𞤫𞤥𞤲'𞤺𞤢𞤤 𞤥𞤢𞥄𞤲𞤢𞥄 𞤲'𞤺𞤢𞤤 𞤬𞤭𞤪𞤢𞤼𞤢𞥄 𞤥𞤢𞥄𞤲𞤢𞥄. 𞤒𞤭𞤥𞤩𞤫 𞤩𞤫 𞤬𞤮𞤬 𞤳𞤢𞤱𞤪𞤢𞥄𞤲𞤭 𞤸𞤫 𞤲𞤮 𞤨𞤭𞤪𞤣𞤢𞤼𞤫𞤲 𞤳𞤫𞤤𞤥𞤫 𞤳𞤫𞤧𞤫 𞤯𞤫: 𞤧𞤮 𞤫𞤲 𞤨𞤭𞤪𞤢𞤼 𞤯𞤫 𞤼𞤢𞤲 𞤸𞤫 𞤯𞤫𞤥𞤯𞤫 𞤺𞤮𞤯𞥆𞤫 𞤸𞤢𞤴 𞤧𞤮 𞤱𞤮𞤲𞤢𞥄 𞤨𞤵𞤤𞤢𞥄𞤪 𞤱𞤢𞤤𞥆𞤢 𞤧𞤮 𞤫𞤲 𞤨𞤫𞤲𞤼𞤢𞤲𞤢𞤼 𞤯𞤵𞤥 𞤸𞤫𞤤𞤥𞤫𞤪𞤫 𞤬𞤵𞤤𞤯𞤭𞤲𞤢𞥄𞤲'𞤣𞤫 𞤸𞤢𞤴 𞤧𞤮 𞤬𞤢𞥄𞤥𞤢𞥄𞤥𞤵𞤴𞤢 𞤥𞤵𞤥 𞤭𞤲 𞤲𞤮𞤣𞥆𞤭 𞤼𞤭𞥅𞤲𞥆𞤢𞥄𞤪𞤫 𞤥𞤢𞤱𞤲'𞤣𞤫.